Author Guidelines
Tungumál og málfar
Greinar í tímaritinu eru eingöngu birtar á íslensku og áskilja ritstjórar sér rétt til þess að hafna greinum sé málfari eða stafsetningu verulega ábótavant. Heimilt er að senda inn handrit á ensku en sé það samþykkt til birtingar með fyrirvara um fullnægjandi þýðingu á íslensku. Höfundar bera ábyrgð og kostnað af þýðingu handrita á íslensku. Prófarkir eru sendar höfundum einu sinni og skal þeim skilað innan 48 klukkustunda frá móttöku.
Forsíða
Heiti greinar skal birt á sérstaklega útbúinni forsíðu, þar sem nöfn höfunda, vinnustaður eða akademískur titill kemur fram ásamt símanúmeri, póstfangi og tölvupósti þess sem tekur á móti próförk og öðrum skilaboðum frá ritstjórn.
Útdráttur
Greinum skal fylgja útdráttur á íslensku og ensku sem ekki er lengri en 150-200 orð og fjallar um markmið, aðferðir og helstu niðurstöður greinar. Útdráttur skal fylgja á sérstakri blaðsíðu, strax á eftir titilsíðu.
Meginmál
Æskileg lengd almennra greina er 6.000 til 8.000 orð, en athugasemdir og bókadómar skulu vera 1.000 til 3.000 orð. Tilvitnanir sem eru innan við 40 orð skulu vera innan íslenskra „gæsalappa" en tilvitnanir sem eru 40 orð eða lengri skulu vera inndregnar. Fyrsta stigs millifyrirsagnir skulu vera feitletraðar en annars stigs millifyrirsagnir skáletraðar. Áætluð staðsetning á töflum og myndum skal gefin til kynna í textanum en í handritinu skulu töflur og myndir vera staðsettar á sérstökum blöðum á eftir heimildaskrá.
Neðanmálsgreinar
Forðast skal neðanmálsgreinar eftir því sem kostur er. Séu neðanmálsgreinar nauðsynlegar skulu þær vera stuttar og takmarkast við mikilvægar útskýringar. Í handriti skulu neðan-málsgreinar vera númeraðar á sérstöku blaði á eftir meginmáli en á undan heimildaskrá.
Tilvísanir
Tilvísanir í texta skulu vera á forminu (höfundur, ártal: blaðsíðutal). Séu höfundar fleiri en þrír skulu tilvísanir vera á forminu (fyrsti höfundur o.fl., ártal: blaðsíðutal).
Heimildaskrá
Heimildaskrá skal vera á eftir meginmáli og byrjar á nýrri blaðsíðu. Nöfn tímarita, bóka og skýrslna skulu vera skáletruð. Íslenskum höfundum er raðað í stafrófsröð samkvæmt skírnarnafni en erlendum höfundum samkvæmt eftirnafni.
Dæmi um skráningu heimilda:
Baumer, Eric P., Richard Wright, Kristrún Kristinsdóttir og Helgi Gunnlaugsson. (2001). Crime, shame, and recidivism: The case of Iceland. British Journal of Criminology, 42, 40-59.
Berglind Rós Magnúsdóttir og Þorgerður Einarsdóttir. (1997). Er grunnskólinn kvenlæg stofnun? Bls. 151-172 í Arna H. Jónsdóttir, Steinunn Helga Lárusdóttir og Þórdís Þórðardóttir (ritstj.), Kynjamyndir í skólastarfi. Reykjavík: Rannsóknarstofnun Kennaraháskóla Íslands.
Guðbjörg L. Rafnsdóttir. (2009). EPM technology and the psychosocial work environment. Erindi flutt á Annual Meeting of the American Sociological Association, San Francisco 8.-11. ágúst 2009.
Hagstofa Íslands. (2010). Gistinætur og gestakomur á hótelum í nóvember 2009. http://hagstofa.is/Pages/95?NewsID=4456. sótt 7. janúar 2010.
Stefán Ólafsson og Kolbeinn H. Stefánsson. (2005). Hnattvæðing og þekkingarþjóðfélag. Reykjavík: Háskólaútgáfan.
Töflur
Töflur skulu vera í númeraröð og heiti þeirra skal vera lýsandi fyrir innihaldið. Hver tafla skal vera á sérstöku blaði á eftir heimildaskrá. Töflur skulu vera í einföldum texta með tvöföldu línubili og dálkabili (tabs) til að aðgreina dálka. Ekki skal nota skilgreinda töfluramma í ritvinnsluforritum.
Myndir
Myndir skulu vera í númeraröð og heiti þeirra skal vera lýsandi fyrir innihaldið. Myndum ber að skila á sérstöku blaði á eftir töflum á forminu pdf, tiff eða jpg. Skýringar þurfa að fylgja myndum eftir því sem við á. Höfundar bera ábyrgð á því að afla tilskilinna leyfa til birtingar mynda.
Annað
Um önnur atriði skal fylgja leiðbeiningum Acta Sociologica til höfunda, sjá nánar vefslóð http://asj.sagepub.com.
